Norðurhálendið er einstakt og þar er að finna margar náttúruperlur, má þar nefna Kverkfjöll, Öskju, Herðabreið, Laugafell, Dettifoss, Hljóðaklettar og fleira. Það er tilvalið að reima á sig gönguskóna og upplifa náttúruna með styttri eða lengri gönguferðum sem hæfa hverjum og einum og liggja sumar leiðir til margra af sérstæðustu stöðum landsins. Á norðurhálendinu er mikil víðátta. Heiðarnar sem leiða okkur inn til jöklanna eins og Arnarvatnsheiði inn að Langjökli, Eyvindarstaðaheiði inn að Hofsjökli og Ódáðahraunið inn að Vatnajökli eru flestar aðgengilegar sæmilega búnum bílum og opna nýja sýn fyrir ferðamenn á Norðurlandi. Fjallvegir eru almennt ekki opnaðir fyrr en komið er fram á sumar en ekki er síður fallegt að ferðast um hálendið í haustkyrrðinni. Um þetta svæði lykkjast fjallvegirnir Kjölur og Sprengisandur.
